Ajira Mpya za Walimu Kwa Mwaka 2015 Zimetoka......Bofya Hapa Kuona Majina

Monday, April 27, 2015

Ajira Mpya za Walimu Kwa Mwaka 2015 Zimetoka......Bofya Hapa Kuona Majina

A: Orodha ya Walimu na Mafundi Sanifu Maabara Ajira Mpya
 

Ofisi ya Waziri Mkuu - TAMISEMI inatangaza ajira ya wahitimu wa mafunzo ya ualimu na mafundi sanifu maabara katika mamlaka ya Serikali za Mitaa kama ifuatavyo:-

 

i. walimu wa cheti (Daraja IIIA) kwa ajili ya shule za msingi 11,366;

 

ii. walimu wa stashahada 4,151 na shahada 12,490 kwa ajili ya shule za sekondari

 

iii. mafundi sanifu maabara 264 kwa ajili kusimamia maabara na kuandaa masomo ya sayansi kwa vitendo katika shule za sekondari

B: Utaratibu Ajira Mpya kwa Walimu na Mafundi Sanifu Maabara

Kila mwajiriwa mpya anatakiwa kuzingatia yafuatayo:-

 

i. walimu wenye sifa waliohitimu mafunzo kwa mwaka wa masomo 2013/14 wamepangwa pamoja na walimu wa sekondari wa masomo ya sayansi na hisabati waliohitimu miaka ya nyuma na wameomba kuajiriwa;

 

ii. kuripoti kuanzia tarehe 01 Mei hadi 09 Mei 2015 kwenye Ofisi za Wakurugenzi wa Halmashauri kwa ajili ya kuajiriwa na kupangwa vituo vya kazi;

 

iii. kuwasilisha vyeti halisi vya taaluma ya kuhitimu mafunzo, elimu ya sekondari, cheti cha kuzaliwa pamoja na nakala zake;

 

iv. hakutakuwa na mabadiliko ya vituo vya kazi; na

 

v. fedha za kujikimu kwa muda wa siku saba (7) na nauli ya usafiri wa magari (ground travel) zitatolewa kwenye halmashauri husika baada ya kuripoti.

 

Sunday, April 26, 2015

CHADEMA Wakamatwa na Vifaa vya Kijeshi

Mnamo tarehe 24/4/2015 huko maeneo ya Sogea Tunduma Wilaya ya Momba Mkoa wa Mbeya, METHEUS ANGANILE MWAFONGO, Mndali, 37yrs, Mkuu wa Ulinzi CDM Wilaya Momba, pamoja SALEHE TABLEI@SICHALWE, 22yrs, mkazi wa Majengo Tunduma walikamatwa kutokana na taarifa za kiintelijensia.
 
Watu  hawa walikamatwa wakiwa na buti pair 2 za kijeshi, kofia pair 2 za kijeshi, kamba kurukia ya mazoezi, vyuma kwa ajili ya mazoezi ya pushup, visu pair 2 kimoja spring knife na kingine kisu kikubwa, miwani ya FFU(ya kwenye misafara), manati pair 2 na mawe yake 40 pamoja na nati 4 zilizotarajiwa kutumiwa kama mawe, shenguard kwa ajili ya mikono na miguu pair 4, Bendera 2 za CDM, Tshirt 1 ya CDM, Kilemba 1, koti 1, Pamoja na barua 3 za CDM za kata ya MSANGANO, SHITETE, na KAMSAMBA (W) MOMBA zenye kichwa cha habari "UTOAJI WA VIONGOZI WA RED BRIGED KATIKA KATA YENU KWA MAFUNZO YA RED BRIGED". 
 
Barua inasomeka hivi
Husika na kichwacha barua hapo juu chajifafanua vema.

Napenda kukujulisha kuwa kutakuwa na ziara ya kimafunzo ya RB (Red Briged) katika kata yenu kwa ajili ya maandalizi ya uchaguzi utakaofanyika mwezi wa kumi mwaka huu.

Na kwa barua hii naomba uwapokee na uwape ushilikiano wa kutosha kwa ajili ya maendeleo ya chama chetu.

Ni matumaini yangu kuwa utawapokea na kuwatunza pamoja na usalama wao.

Wako katibu wa chama Wilaya.
 

Katika mahojiano vijana hawa walikuwa wakienda kutoa mafunzo ya kijeshi katika kata tajwa na mpango wao ni kufundisha vijana 300 katika wilaya ya Momba na mpango huu ni wa mkoa na Nchi nzima chini ya Mkurugenzi wa Usalama Taifa CDM bwana LWAKATARE.

WATU 20 WAKAMATWA NA POLISI KWA KUMSHUSHIA KIPIGO ASKARI POLISI HUKO MOROGORO

WATU 20 wamekamatwa na Polisi baada ya kumjeruhi askari aliyekuwa doria. 

Kamanda wa Polisi wa Mkoa wa Morogoro, Leonard Paulo alisema watu hao 20 wanatuhumiwa kumpiga na kitu butu kichwani Askari Polisi mwenye namba F 3328 Cpl Ramadhani akiwa kwenye doria na mwenzake.

Pia kamanda huyo alisema Polisi inamshikilia mkazi wa Mawenzi mjini hapa, Dikanyo Ramadhani (29) kwa kupatikana na kete 87 za dawa za kulevya aina ya heroin ambazo thamani yake haikuweza kujulikana mara moja.

Mtuhumiwa huyo alikamatwa Aprili 23, mwaka huu majira ya saa nne usiku katika maeneo ya Soko kuu la Manispaa ya Morogoro.

Alisema Polisi waliokuwa doria maeneo hayo walimtilia shaka mtu huyo na baada ya kumpekua kwenye mifuko yake ya suruali walimkuta akiwa na kete hizo 87.

Akizungumzia tukio la kupigwa askari, Kamanda huyo alisema watu 20 wakazi wa Mindu na Sangasanga, Manispaa ya Morogoro walimshambulia kwa kumpiga na kitu butu kichwani askari wa jeshi hilo mwenye namba F 3328 Koplo Ramadhani.

Kwa mujibu wa Kamanda huyo, askari huyo baada ya kupigwa na watu hao alikimbizwa katika Hospitali ya Rufaa ya mkoa wa Morogoro ambako amelazwa na anaendelea vizuri na matibabu.

Alisema kuwa tukio hilo lilitokea Aprili 23, mwaka huu majira ya saa 4: 45 asubuhi eneo la Mindu, barabara kuu ya Morogoro- Iringa, Manispaa ya Morogoro, ambapo pikipiki isiyofahamika namba za usajili iliyokuwa ikiendeshwa na Juma Abasi (18), mkazi wa Mindu kuligonga gari lenye namba za usajili T 953 AQF aina ya Isuzu Tipper iliyokuwa ikiendeshwa na Joseph Laurent (28) , mkazi wa Modeco.

Kwa mujibu wa Kamanda huyo pikipiki hiyo iliyokuwa ikitokea Mindu Bwawani kuelekea barabara ya Iringa, mwendeshaji wake alipowaona askari Polisi wawili waliokuwa doria maeneo hayo wakiwa na pikipiki, aligeuka ghafla na kuingia barabarani bila kuchukua hadhari na kuigonga gari hiyo iliyokuwa ikitokea Morogoro mjini kuelekea Sangasanga na kusababisha majeraha kwa mpanda pikipiki huyo.

Kamanda huyo wa Polisi wa mkoa alisema chanzo cha ajali hiyo ni uzembe wa mwendesha pikipiki huyo kuingia barabarani bila kuchukua tahadhari.

Hata hivyo alisema ajali hiyo ilishuhudiwa na askari hao waliokuwa doria na pikipiki maeneo hayo na hivyo walifika eneo la ajali ili kutoa msaada na katika harakati hizo za kutoa masaada ndipo askari Koplo Ramadhani alipopigwa na kitu butu kichwani na watu waliotokea eneo hilo na kuanguka chini.

Saturday, April 25, 2015

Muuguzi amchapa mjamzito viboko......Ni wakati wa uchungu wa kujifungua, Mtoto afia tumboni.

Muuguzi mmoja wa zahanati ya Muungano, Chamwino, mkoani Dodoma, amekumbwa na kashfa nzito baada ya kudaiwa kumchapa viboko mama mjamzito, wakati akiwa katika hali ya uchungu wa kujifungua na kusababisha mtoto aliyetaka kujifungua kufariki akiwa tumboni.

Aidha, mama huyo ambaye kwa sasa amelazwa katika chumba cha uangalizi maalumu (ICU) katika Hospitali ya Rufaa ya Mkoa wa Dodoma, hali yake inaelezwa kuwa mbaya.

Mwanamke huyo, Mariamu Maroda, anadaiwa kulazwa kwenye chumba hicho kwa zaidi ya wiki moja, ambapo pamoja na kufanyiwa upasuaji, hakufanikiwa kupata mtoto wake akiwa hai.

Akisimulia mkasa huo, mama mdogo wa Maroda, Joyce Charles, alisema Aprili 3, mwaka huu Saa 12:00 jioni, walimpeleka zahanati ya Muungano akiwa na dalili za kujifungua na kupokelewa na muuguzi aliyemfahamu kwa jina la Lucy. 

 

“Nilishuhudia Lucy akimchapa Maroda viboko kwenye mapaja na mgongoni, akisema ana uwezo wa kujifungua lakini anadeka tu, nilishindwa kuingilia nikihofia asimdhuru zaidi mwanangu, ila nilihuzunika sana,” alisema.

Alisema muuguzi huyo alitumia fimbo tatu kumchapa mgonjwa wake, ambazo alikuwa akizitumia kila moja inapovunjika. Alisema fimbo hizo zilipomalizika, alianza kumfinya kwenye mapaja kwa kutumia rula.

“Kesho yake saa 12:00 alfajiri, huku hali ya mgonjwa ikiwa mbaya, walitupatia gari likatupeleka hospitali ya Mvumi Misheni, ambako walisema hali aliyokuwa nayo mgonjwa wasingeiweza na kutuelekeza tumpeleke hospitali ya rufaa, lakini walimpa mgonjwa chupa mbili za damu,” alisema.

Alisema Maroda alifikishiwa chumba cha upasuaji na kisha alilazwa wodi namba 17, lakini miguu na tumbo vilianza kuvimba na alipochunguzwa ikabainika ana usaha tumboni, hivyo aliamriwa arudishwe kwenye chumba cha upasuaji.

 

 “Yaani ukimuona, mwilini ana alama za fimbo na kufinywa. Sasa walipomfanyia upasuaji kwa awamu ya pili, alipelekwa ICU mpaka hivi tunavyozungumza ni zaidi ya wiki moja,” alieleza Charles.

Viongozi wa Hospitali ya Rufaa, wenye mamlaka ya kuzungumzia suala hilo walionekana ‘kurushiana mpira’ walipotakiwa kuelezea suala hilo. Hata hivyo, Muuguzi Mkuu wa Mkoa wa Dodoma, Anatoria Mkindo, alikiri kuwepo kwa mgonjwa huyo.

Awali Kaimu Mganga Mfawidhi wa hospitali hiyo, Dk. Zainab Chaula, alisema hakuwa na taarifa za kina kuhusu Maroda.

 

Mkindo alisema walikuwa wameagiza Ofisi ya Mganga wa Wilaya wa Chamwino, kuwapelekea taarifa kuhusu suala hilo.

Alisema pia wametaka Ofisi ya Mganga Mkuu wa mkoa, ifahamishwe hatua zilizochukuliwa dhidi ya mtumishi aliyedaiwa kumchapa viboko mjamzito huyo.

“Mimi sio msemaji, anayetakiwa kuwapa taarifa kamili ni RMO (Chaula) kwanini awalete kwangu, nilichowaeleza ni ambacho nafahamu lakini siyo msemaji, nashauri muende ofisini kwa matroni wa hospitali mtapata taarifa kamili,” alisema.

Afisa Muuguzi wa ICU, Christina Mlumba, alisema, Maroda alipelekwa ICU baada ya kufanyiwa upasuaji na kwamba hali yake inaendelea vizuri.

Mdogo wa Maroda, Silika Mkwawi alivieleza vyombo vya habari kuwa ingawa hakuingia kwenye chumba cha kujifungulia katika zahanati ya muungano, dada yake alipotolewa nje, muuguzi alimueleza kuwa alimchapa fimbo mbili tu, kwa sababu ya kudeka kwake.

Thursday, April 23, 2015

Mwili wa mwanafunzi Kiteto Aliyefariki Kwa Kuchapwa Viboko na Walimu wafikishwa Dodoma

MWILI wa mwanafunzi wa kidato cha pili katika Shule ya Sekondari Matui iliyoko Wilaya ya Kiteto, Mkoa wa Manyara, aliyedaiwa kufariki baada ya kuchapwa viboko na walimu wake, Emmanuel Mbigima (15), umefikishwa katika Hospitali ya Rufaa ya Mkoa wa Dodoma.

Wakati mwili huo unafikishwa hospitalini hapo jana asubuhi, ulikuwa umewekwa kwenye gari la Halmashauri ya Wilaya ya Kiteto ukisindikizwa na baadhi ya ndugu wa karibu wa familia ya marehemu.

Akizungumza na waandishi wa habari hospitalini hapo, babu wa marehemu, Emmanuel Ngowi, alisema mwili huo umeletwa hospitalini hapo kwa ajili ya kufanyiwa vipimo ambavyo vimekosekana katika hospitali ya Wilaya ya Kiteto.

"Mjukuu wangu alipigwa na walimu watatu tarehe 20 mwezi huu kutokana na kufeli mtihani wa somo la Kiswahili.

“Tumechukua uamuzi wa kumleta hapa kwa sababu madaktari wa Hospitali ya Wilaya ya Kiteto, walishindwa kubaini kichwa kimeathirika kwa kiasi gani kwa kuwa hawana vifaa vya uchunguzi vya  kichwa.

“Hata hivyo, majibu ya uchunguzi wa awali yaliyotolewa katika hospitali hiyo, yalionyesha jicho la kulia lilivuja damu kwa ndani na pia mwili wa marehemu ulikuwa na michubuko miguuni,” alisema Ngowi.

Naye mjomba wa marehemu, Michael Ezekiel alisema matukio ya wanafunzi kupigwa na kupoteza maisha yamekuwa yakijirudia shuleni hapo kwa kuwa hakuna hatua zinazochukuliwa dhidi ya watuhumiwa.

“Mwaka jana kuna mtoto alipigwa na mwalimu akafariki, lakini mtuhumiwa alipelekwa mahakamani na baadaye kuachiwa kwa madai kuwa mtoto alikuwa ni mgonjwa,” alisema.

Kwa upande wake, Kaimu Mganga Mfawidhi wa Hospitali ya Rufaa ya Dodoma, Dk. Zainabu Chaula, alithibitisha kupokelewa kwa mwili huo na kusema uchunguzi bado unaendelea.

Awali, akizungumza na MPEKUZI baada ya mwanafunzi huyo kufariki, Kamanda wa Polisi Mkoa wa Manyara, Christopher Fuime, aliwataja walimu waliohusika katika tukio hilo na ambao wanashikiliwa na Jeshi la Polisi, kuwa ni Machael Bajutta (28), Chalamilla Gereza (33) na Mwalimu Joyce Msiba (36).

Breaking News: Watu 10 Wafariki Dunia Baada ya Basi la kampuni ya Unique Kugongana na Gari la Coca Cola

Habari  zilizotufikia  zinaarifu  kuwa  basi la Unique lenye namba za usajili T148 BKK likitokea jijini Mwanza kwenda Tabora limegongana uso kwa uso na lori la kampuni la Cocacola katika kijiji cha Ibingo kata ya Samuye Shinyanga.

Watu 10 wamefariki na  50 wamejeruhiwa.Majeruhi wamekimbizwa katika hospitali ya mkoa wa Shinyanga.

Picha  na  habari  ya  kina  itakuijia  baadaye.

Mengine kutoka Afrika Kusini pamoja na picha 12 hali ilivyokua

Mitandaoni kumekuwa na picha na video nyingi zimesambaa zikionesha hali ilivyokuwa Afrika Kusini kwa zaidi ya wiki moja, tumesikia na kuona mashambulizi ambayo wamefanyiwa watu ambao sio raia wa Afrika Kusini ndani ya nchi hiyo, video nyingi na picha zinasikitisha.. watoto wanauawa, wanajeruhiwa.. vurugu ilikuwa kubwa sana.

Hapa ni ndani ya Kambi ya muda ambayo wamehifadhiwa wageni, yani walikuwa na maisha yao kawaida tu mtaani baadae wanajikuta ni wakimbizi.

Cha mwisho kilichonifikia ni kuhusu ishu ya Waziri wa Usalama wa South Africa, Nosiviwe Mpisa-Nqkula kutangaza kwamba sasa wanaoingia kupambana na watu wanaofanya vurugu hizo ni wanajeshi baada ya kuonekana kama Polisi wameelemewa nguvu na hali ilivyo mitaani, watu saba waliripotiwa kufariki pia.

Baadhi ya watu waliokusanyika kulaani mashambulizi ya wageni ndani ya Afrika Kusini.

Mtaani hali haikuwa sawa, hili ni sehemu ya kundi kubwa la watu waliokuwa wanaandamana kupinga Xenophobia, ubaguzi wa kutaka wageni waondoke Afrika Kusini.

Akina mama na watoto wao, wako kwenye foleni kusubiri chakula cha msaada ndani ya Kambi ya wakimbizi ambayo wamehifadhiwa kwa muda.

Waandamanaji wakiwa na silaha, hali haikuwa shwari hata kidogo kwa wageni.

Askari wakiendelea na zoezi la kuwakamata watu wanaochochea mashambulizi ya wageni

Mmoja ya majeruhi akipatiwa huduma ya dharura ya matibabu.

Hali ilivyo kwenye Kambi walizohifadhiwa wageni

Foleni ya kupokea chakula cha msaada ndani ya Kambi

Waandamanaji na silaha zao mtaani

Mfalme wa Wazulu, Goodwill Zwelithini. Analaumiwa kusababisha machafuko yaliyotokea Afrika Kusini kutokana na kauli yake aliyoisema kwamba wageni wanatakiwa warudi kwao. Jumatatu April 22 amekanusha kushinikiza machafuko hayo

Waziri wa Mambo ya Nje, Bernard Membe alisema kuna Watanzania waliouawa lakini mauaji hayo hayakutokana na vurugu hizi za kuwakataa wageni.

Pole kwa watu wetu wote ambao wameathirika kutokana na vurugu hizi.

WASHINDI WA SAFARI LAGER WEZESHWA KANDA YA MBEYA WATEMBELEA KIWANDA CHA BIA, WAKABIDHIWA VYETI VYA MAFUNZO YA UJASILIAMALI‏

WASHINDI WA SAFARI LAGER WEZESHWA KANDA YA MBEYA WATEMBELEA KIWANDA CHA BIA, WAKABIDHIWA VYETI VYA MAFUNZO YA UJASILIAMALI‏

KAMPUNI ya bia Tanzania (TBL) imetenga zaidi ya shilingi Milion 220 kwa ajili ya kuwawezesha wajasiliamali wadogo wadogo ili kuinua mitaji yao ya biashara katika shindano la Safari lager wezeshwa.

Hayo yalibainishwa na Meneja wa Wilaya ya Mbeya wa TBL, Vivianus Lwezaura, alipokuwa akifunga mafunzo ya washindi wa Safari lager wezeshwa awamu ya nne 2014/2015 yaliyofanyika mwishoni mwa wiki katika Hoteli ya Peter Safari iliyopo Ilomba Jijini Mbeya.

Lwezaura alisema kampuni hiyo imekuwa na utaratibu wa kutenga sehemu ya faida yake kwa ajili ya kuwainua wafanyabiashara wadogo kwa kuwapa mitaji kupitia shindano la Safari lager wezeshwa.

Akizungumza na washiriki wa mafunzo hayo, meneja huyo aliwataka washindi wa Safari lager wezeshwa kuwa mabalozi wa kampuni ya TBL waendako ili kuwahamasisha wajasiliamali wengine kujitokeza katika shindano hilo klwa kuwa ni mkombozi wa mtanzania mwenye kipato cha chini.

Alisema shindano linakuwa halina maana kama kampuni inatumia gharama kubwa kutangaza lakini wafanyabiashara wanaojitokeza wanakuwa wachache hivyo kuigharimu kampuni ambayo inatumia fedha nyingi kuwataarifu washiriki kupitia matangazo mbali mbali.

Awali akimkaribisha Meneja huyo ambaye alikuwa mgeni rasmi, Mkufunzi wa Mafunzo hayo  Deodati Bernard, kutoka kampuni ya Huduma ya maendeleo ya biashara(TAPBDS), alisema mchakato wa kuwapata washindi ni mgumu na hakuna upendeleo wowote unaofanyika.

Alisema katika shindano la awamu hii jumla ya Wafanyabiashara 3500 walijitokeza Nchi nzima ambapo Kanda ya Nyanda za juu kusini walikua zaidi ya 1000 lakini baada ya kupitia vigezo na masharti wakachujwa na kubaki 29 ambao walitembelewa bila wao kujijua na hatimaye kupatikana 12.

Aliongeza kuwa hao 12 baada ya kufuzu hatua zote wamepatiwa mafunzo namna ya kuendesha biashara zao kwa faida kabla ya kukabidhiwa vifaa walivyoomba kutoka katika shindano la Safari lager Wezeshwa.

Kwa upande wao washiriki walisema watakuwa mabalozi wazuri kwa wananchi ili kuwahamasisha na wao kushiriki katika mashindano yajayo ambapo washiriki hao walipata fursa pia ya kutembelea kiwanda cha bia cha TBL Mbeya kujionea shughuli zinazofanywa.

 Meneja wa Wilaya(District Manager)wa TBL Mbeya, Vivianus Lwezaura akizungumza wakati akifunga mafunzo ya Washindi wa safari lager wezeshwa kanda ya Mbeya.

 Meneja wa Wilaya(District Manager)wa TBL Mbeya, Vivianus Lwezaura akizungumza na washiriki wakati akifunga mafunzo ya Washindi wa safari lager wezeshwa kanda ya Mbeya.

 Mkufunzi wa washiriki wa safari lager wezeshwa, Deodati Bernard akimkaribisha mgeni rasmi kufunga mafunzo ya safari lager wezeshwa.

 Mkufunzi mwezeshaji, Sizya Puya, akizungumza jambo katika hafla ya kufunga mafunzo ya washindi wa safari lager wezeshwa.

 Meneja wa Wilaya(District Manager)wa TBL Mbeya, Vivianus Lwezaura akikabidhi vyeti kwa washiriki wa safari lager wezeshwa kanda ya Mbeya.

SERIKALI YAANZA KUTATUA MIGOGORO KWA WANANCHI DHIDI YA HIFADHI ZA TAIFA.

 Waziri wa Maliasili na Utalii, Lazaro Nyalandu  akiongea na waandishi wa habari.

Mkutano na waandishi wa Habari Ukiendelea

SERIKALI imeazimia kumaliza migogoro yote ambayo ipo kwa wananchi ambapo Wizara ya maliasili na utalii imeanza kuihesabu ili itatuliwe mapema iwezekanavyo ikiwa ni sehemu ya utekelezaji wa Ilani ya Chama cha mapinduzi(CCM).

 

Hayo yalibainishwa na, Waziri wa Maliasili na Utalii, Lazaro Nyalandu, alipokuwa akizungumza na vyombo vya habari baada ya kumaliza ziara yake wilayani Mbarali, ambapo alisema Serikali imeona ianze upya kufuatilia suala hilo ikiwa ni pamoja na kutatua mgogoro uliopo.

 

Waziri Nyalandu alilazimika kufanya ziara Wilayani Mbarali kufuatia kuwepo kwa mgogoro wa wananchi wa vijiji 21 kugomea kupisha hifadhi ya Ruaha.

 

Waziri Nyalandu alisema uamuzi wa kuvihamisha vijiji hivyo ili kupanua hifadhi ya Ruaha ulitokana na tangazo la Rais (GN28) la kuifanya eneo la Ihefu na vijiji vinavyoizunguka kuwa sehemu ya hifadhi.

 

Alisema mgogoro huo ulianza mwaka 2009/2010 baina ya Usangu game reserve na bonde la Ihefu kwenda Ruaha ambapo wakazi wa maeneo hayo ambao walipangwa kuhama walitengewa fidia shilingi Bilion 4 na baadaye kuongezwa Bilion 3 na kuwalipa fidia jumla ya Bilion 7.

 

Alisema baada ya hapo mgogoro ulitokea kwa baadhi ya wananchi kudai kulipwa tofauti na makadirio, wengine kudhurumiwa kabisa  hivyo Serikali imeona wananchi hao wasiondoke kwanza hadi madai yao yahakikiwe kwanza ambapo madai yote yanatarajiwa kuanza kulipwa Julai 1, mwaka huu.

 

Aliongeza kuwa mgogoro huo umetokana na tangazo la serikali kuandaliwa tofauti na matakwa ya wananchi, pia maeneo yalioyoagizwa yakawa tofauti na maeneo yaliyoorodheshwa  ambapo maeneo ya awali hayakuguswa kabisa.

 

Waziri Nyalandu alisema kutokana na hali hiyo, wananchi hao hawataondolewa katika maeneo yao bali timu mbili zimeundwa ili kuchunguza sakata hilo.

 

Alisema timu ya kwanza itafuatilia madai yote kisha watayapeleka kwa Mkuu wa Mkoa wa Mbeya ambaye atayawasilisha wizarani kwa ajili ya utekelezaji.

 

Alisema timu ya pili itakuwa ya wataalamu wa Ikolojia ambao wataangalia mfumo wote wa ekolojia na maji na namna ya kutatua mgogoro ili wananchi wawe sehemu ya hifadhi pamoja na kuangalia namna maji yasiharibu mto Ruaha Mkuu.

 

Aidha alitoa wito kwa Wananchi kuacha kuingiza mifugo yao ndani ya hifadhi ya Ruaha mkuu bali wanapaswa nao kuwa sehemu ya uhifadhi.

Hawa majambazi walimuibia Mzungu leo Dar es salaam, wakadakwa hapa kwenye foleni na gari lao

Posted by: Newsroom TZA April 21, 2015 General News

Hii ishu imechukua headlines kwenye mitandao ya kijamii ambapo wengine hawakuwa na taarifa kamili kuhusu tukio lenyewe, nikaifatilia kwa ukaribu na kupata taarifa kamili kupitia kwenye blog ya Issamichuzi ambayo imekua ikifanya vizuri kwenye utoaji wa habari.

Ishu inahusu tukio la ujambazi ambalo limetokea leo Kinondoni Dar es salaam ambapo majambazi wanne wamemvamia na  kumpora mtu mmoja ambae ni raia wa kigeni (mzungu) na kisha wakakimbia.

Sasa kwa ufupi ilivyokuwa kuna mtu aliwafatilia mpaka eneo la mataa ya Red Cross na gari yake alafu akawablock ambapo Askari tayari waliopewa taarifa wakafanikiwa kuwakamata wakiwa na bunduki mbili.

Naifuatilia hii kujua mengine mengi zaidi, kila nitakachokipata utakipata hapahapa

Maelezo ya hili tukio yametoka kwa Issa Michuzi

Unahitaji chochote ninachokipata kisikupite? jiunge na mimi kwenye Twitter, Facebook na Instagram kwa kubonyeza hapa >>>  Twitter Insta FB  na nitakua nikikutumia kila ninachokipata pia usisahau kusubscribe YouTube kwa kubonyeza hapa >>>> Videos ili kila video ya AyoTV ikufikie.

MSANII FEROOZ ATIWA MBARONI KWA UTAPELI

MSANII FEROOZ ATIWA MBARONI KWA UTAPELI

Tena? Kwa mara nyingine staa wa Bongo Fleva, Ferooz Mrisho ametiwa mbaroni kwa utapeli akidaiwa ‘kuchikichia’ fedha za kumpangisha nyumba jamaa aliyejitambulisha kwa jina la Tony Noah kiasi cha zaidi ya Sh. milioni 3.2 kisha kuingia mitini ikielezwa kuwa nyumba hiyo ina mgogoro.

Staa wa Bongo Fleva, Ferooz Mrisho.

Kwa mujibu wa chanzo chetu cha kuaminika, ilidaiwa kwamba, staa huyo aliyewahi kutamba na Ngoma ya Starehe amekuwa na tabia ya kuwaingiza watu mkenge kwa lengo la kutafuta mpangaji kwenye nyumba hiyo iliyopo Sinza- Mori, Dar ambayo anaishi na ndugu zake.

Kilitiririka kuwa, awali Ferooz alikuwa akitafuta mpangaji wa nyumba hiyo kupitia kwa dalali ndipo Tony akavutiwa na nyumba hiyo na kukubaliana kutoa kodi ya Sh. milioni 3, 250,000 kwa mwaka.Kilidai kwamba Tony alipomlipa Ferooz fedha hiyo, Machi 14, mwaka huu ndipo akaanza kumpiga kalenda ndipo aliamua kulipeleka shauri kwenye chombo cha sheria.

Kutokana na sekeseke hilo, mwanahabari wetu alimtafuta Tony ambaye alisema kuwa, baada ya kukubaliana na Ferooz kumpa fedha hizo na kuona anaanza kumzungusha kuhamia kwenye nyumba hiyo alimwambia waandikishiane kwenye Kituo cha Polisi Kijitonyama, Dar (Mabatini) kuwa atamlipa fedha hizo Aprili 15 lakini Ferooz hakufanya hivyo.

Kutokana na ishu hiyo, hadi gazeti hili linakwenda mtamboni, Ferooz alikuwa ameshikiliwa Mabatini kwa jalada la kesi namba KJN/RB/3898/15 KUJIPATIA FEDHA KWA NJIA YA UDANGANYIFU.Mwaka jana Ferooz alishikiliwa kituoni hapo kwa msala wa kukamatwa na bangi.

Sunday, April 19, 2015

Mwalimu ajinyonga, mtendaji agongwa na kufariki papo hapo

Watu wawili wamekufa mkoani Mara katika matukio mawili tofauti. 

 

Akizungumzia matukio hayo Kaimu Kamanda wa Polisi mkoani hapa, Audax Mjaliwa alisema katika Mtaa wa Nyamatare Manispaa ya Musoma, mwalimu Tengeru Mongu (43) wa Shule ya Msingi Igina wilayani Serengeti alikutwa amejinyonga katika chumba cha binamu yake Mauma Machunde.
 

Akisimulia mkasa huo binamu wa marehemu huyo alisema, alipoamka jana asubuhi, alikwenda kumgongea mgeni wake huyo bila mafanikio hali iliyomchanganya na kutoa taarifa kwa majirani waliofika kumsaidia kuvunja mlango.
 

Machunde alisema, baada ya mlango kuvunjwa alimkuta binamu yake akining’inia juu ya dari akiwa amejinyonga kwa kutumia shuka na sababu za kujinyonga hazijajulikani kwani hakuacha ujumbe wowote. 
 
Mwalimu ambaye hakutaka jina lake litajwe alisema, marehemu mwalimu huyo alipata uhamisho kutoka Serengeti kwenda Wilaya ya Butiama, uhamisho ambao aliuomba kwa madai kuwa umri alionao anafaa kufanyia kazi maeneo ya nyumbani kwao.
 

Katika tukio jingine basi lililosadikiwa kuwa ni la Kampuni ya Peace Maker katika Barabara ya Bunda - Kiabakari kwenye Kitongoji cha Kibisa, Kijiji cha Nyamisisi, Butiama limemgonga mtembea kwa miguu jana usiku saa mbili usiku na kumsababishia kifo cha papo hapo.
 

Akizungumzia ajali hiyo mtoto wa marehemu, Alfred Kitambara, Veronika Kitambara alisema, baba yake ni Mtendaji wa Kata ya Kyanyari na alipopata ajali hiyo alikuwa akitoka katika mkutano wa kijiji akiwa anaendesha pikipiki.
 

Kitambara alisema, wakati baba yake akiwa njiani alipata ajali ya pikipiki ambapo alipiga simu nyumbani na kumweleza mama yake kuwa amepata ajali ya pikpiki amegonga jiwe akaanguka na kudai kuwa hali yake siyo nzuri hivyo alimtaka mama kwenda kumsaidia.
 

“Wakati mama akiwa njiani alikutana na watu wakisema kuwa basi limemgonga mtu lakini halijasimama sidhani kama mtu huyo atakuwa amepona, kufika katika eneo la tukio alikuta aliyegongwa ni baba lakini pikipiki ilikuwa mbali kwa maana hiyo alikuwa ameiacha akawa anatembea ndiyo akagongwa,” alisema Kitambara mtoto wa marehemu.
 

Kaimu Kamanda wa Polisi alikiri kuwapo kwa tukio hilo na kwamba polisi wanaendelea kuchunguza magari ya kampuni hiyo ili kubaini ni gari lipi lililogonga kwa madai kuwa hakuna gari iliyofika kituoni kutoa taarifa hizo.

Saturday, April 18, 2015

Wilaya ya Ileje kunufaishwa na huduma za kifedha‏

TAASISI ya kifedha ya Bayport Financial Services inayojihusisha na mambo ya mikopo kwa watumishi wa wa umma na kampuni zilizoidhinishwa, mwishoni mwa wiki ilizindua tawi lake jipya la 80 wilayani Ileje, mkoani Mbeya, huku Mkuu wa wilaya hiyo, Rosemary Staki Senyamule, akiwataka wananchi wake kukopa kwa sababu maalum.

 Mkuu wa Wilaya ya Ileje, Mheshimiwa Rosemary Senyamule kulia, akionyeshwa nyaraka za ofisi ya Taasisi ya Kifedha ya Bayport Financial Services.

Wageni mbalimbali wakiangalia shughuli za uzinduzi wa tawi jipya la taasisi ya kifedha ya Bayport Financial Services, wilayani Ileje, mkoani Mbeya.

Baadhi ya wageni waalikwa wakisoma vipeperushi vya taasisi ya kifedha ya Bayport Financial Services, wilayani Ileje, mkoani Mbeya.

Meneja wa Kanda ya Nyanda za Juu Kusini wa Bayport Financial Services, Alpha Akim, akizungumza jambo katika uzinduzi wa tawi lao la 80 wilayani Ileje, mkoani Mbeya. 

“Kwanza nawapongeza mno wenzetu wa Bayport Financial Services kwa kuamua kuja kufungua tawi hapa katika wilaya yetu ya Ileje, ila ni muhimu wananchi kukopa kwa sababu maalum ili waweze kuendeleza maisha yao kwa kutumia vyema fursa za mikopo Tanzania.

“Tukifanya hivyo tunaweza kupata maisha bora kwa sababu tutajimudu kiuchumi, hivyo ni wakati wetu kufurahia kuanzishwa kwa huduma za taasisi hii hapa kwetu ileje, maana ndio kwanza wanafungua tawi lao hapa,” alisema.

Naye Meneja wa Kanda ya Nyanda za Juu Kusini, Alpha Akim, alisema kufungua kwa tawi hilo pia ni sehemu ya kutoa ajira kwa vijana sanjari na kuongeza kipato kwa watumishi wa umma na wafanyakazi wa kampuni zilizoidhinishwa kwa kupitia fursa nzuri ya mikopo.

“Watu mbalimbali watapata mwangaza mzuri wa kiuchumi wakiwamo wale watakaopata nafasi ya kufanya kazi nasi, hususan ile ya uwakala, bila kusahau wale watakaokopeshwa bila amana wala dhamana.

“Naomba wananchi na wakazi wa Ileje watumie vyema fursa ya uwapo wa taasisi hii wilayani kwao kwa ajili ya kuhakikisha kwamba wote kwa pamoja tunafanikisha kwa vitendo ndoto ya kukuza uchumi wetu na wa Tanzania kwa ujumla,” alisema Akim, Meneja wa Nyanda za Juu Kusini wa Bayport.

Bayport Financial Services ni taasisi ya kifedha inayojihusisha na utoaji mikopo mbalimbali kama vile fedha taslimu, mikopo ya bidhaa, bima ya elimu kwa uwapendao, ambapo mikopo hiyo inaweza kutolewa ofisini au kwa njia rahisi ya mtandao wa www.kopabayport.co.tz.